Að lesa gegnum samræður fyrir 2 - 3 ára gömul börn - seinni hluti
SEINNI HLUTI
1. Spyrjið opinna og lokaðra spurninga
a. Opin spurning: Ef spurningin er opin hefur barnið möguleika á að tjá sig um málefnið með eigin orðavali, og svarið getur verið langt. Dæmi um opna spurningu er: ,,Hvað finnst þér um úlfinn?“. Barnið ímyndar sér svarið, giskar á og veit ekki hverju það á að svara því svarið er ekki í bókinni. ,,Hvað heldurðu að Depill sé gamall?“, ,,Hvað er stelpan að borða?“.
b. Lokuð spurning: Lokuð spurning gefur bara örfáa svarmöguleika, svo sem ,,já“, ,,nei“ eða ,,veit ekki“. Svarið er að finna í bókinni, t.d. ,,Hver borðaði Rauðhettu?“, ,,Hvað er að gerast hér á myndinni?“, ,,Ert þú á leikskóla?“. Hrósið og hvetjið eins mikið og hægt er og hjálpið barninu eftir þörfum.
2. Tengið fleiri orð við svar barnsins. Þegar barnið segir eitthvað um bókina, endurtakið það og bætið nokkrum orðum við það sem barnið hefur sagt. Fáið síðan barnið til að herma eftir ykkur. Barn getur t.d. sagt ,,stór hundur“ og þið svarið ,,Já, rauði hundurinn er stór“, ,,Hvað er þetta?“ ,,Sítróna“ ,,Já, gul sítróna“.